O pasado sábado día 27 de xuño pechábase a 14 edición da Escola Ambiental de Senda Nova- Concello de Carballo. O acto tivo lugar no Espazo da Naturez de Oza dende onde se repasaron os traballos realizados pola rapazada durante 26 sesións de traballo.

Ao acto asistiu o Concelleiro de Medioambiente, Servizos e Protección Civil Miguel Ángel Vales, que destacou a importancia das familias dentro do conxunto de axudas que conforma a Escola Ambiental. Tamén asistiu Adrián Eirís, presidente de Senda Nova, que aproveitou o momento para resaltar a importancia deste proxecto, sendo vital dentro da propia organización, ao fomentar unha continuidade da mesma grazas ao traballo coa rapazada.

Importancia tiveron as familias e os propios participantes. Nesta edición volvéronse bater records de participación total, aínda que o realmente salientable foi o compromiso de familias e alunado, para acadar un volume de case 25 persoas que participaron no proxecto de xeito continuado durante estes oito meses de programación.

As familias destacaron os cambios nas nenas e nenos participantes durante estas intensas 26 xornadas de traballo, resaltando actividades puntuais diversas como as pernoctas, as vendas na feira ou a propia construción do galiñeiro.

Cabe salientar que dentro da variada programación, as rapazas e rapaces da Escola Ambiental visitaron lugares de interese patrimonial como o dolmen da Pedra Moura, O bosque da Ribeira da Pena ou o Esteiro do Anllóns. Realizaron actividades no Espazo da Natureza de Oza polas mañáns e tamén actividades en diversas horas do día, incluso de noite a través das acampadas en tendas de campaña, fomentando o espírito de convivencia e o coñecemento dos materiais e equipo necesario para as actividades ao aire libre.

Asimesmo, a horta como proxecto transversal ocupou a maior parte do horario no Espazo, plantando máis dunha ducia de especies diferentes dentro e fora do invernadoiro ou colaborando con centros de ensino locais no coidado de especies autóctonas como o carballo.

O tempo de horta aumentou e a colleita fixoo de xeito exponencial. Deste xeito duplicáronse os produtos recollidos, aumentando as plantas levadas para as casas da rapazada e duplicando as xornadas de venda na feira dominical de Carballo.

É de destacar este espazo de mercado para o propio proxecto da Escola Ambiental, ao fomentar a comunicación da rapazada coa sociedade e a exposición do proxecto da Escola á propia sociedade carballesa.

Por último, o novo proxecto do galiñeiro, enfocado principalmente aos máis maiores do proxecto, significou traballar nas destrezas coa ferramenta, aplicando coñecementos do colexio á vida real e traballando en equipo para realizar un equipamento que pechará o círculo de residuos orgánicos, fomentando unha maior permanencia no Espazo.

O acto de clausura serviu para o recoñecemento público do esforzo das rapazas e rapaces durante estes oito meses de traballo, recoñecemento que se realizou cun diploma de lembranza para os e as participantes.

Asimesmo as participantes Sofía Souto e Noa Mourón recibiron un recoñecemento especial por cinco anos de participación.