A nosa asociación estará do 15 ao 22 de agosto compartindo actividades con entidades de Eslovaquia, Grecia, Lituania, Rumanía, Georgia e Italia dentro dun proxecto chamado “Pasta la Vista“, na rexión de Gerlachov, impulsado pola entidade eslovaca “Regionálne centrum mládeže”, para mozos e mozas, no que aprenderemos a cociñar e a mellorar os hábitos de comida, así como a desenvolver a interculturalidade a través da cociña de cada país. Farémolo mediante a práctica, con obradoiros e, sobre todo, coa convivencia. 

Para representar a Senda Nova e a Galicia neste intercámbio europeo, en Senda Nova valoramos de xeito especial o traballo voluntario dos mozos e mozas en entidades da Costa da Morte. Deste xeito, dos máis de 20 interesados e interesadas no proxecto, viaxarán 5 persoas comprometidas coa dinamización social, ambiental e cultural das comarcas de Bergantiños e Soneira.
Agradecemos a todos e todas cantos mostraron interese no proxecto, intentando, nun futuro, poder compartir outras experiencias. Noraboa a todos os que participarán del, desexando lles sexa de utilidade para eles e para as entidades nas que comparten esforzos.

As mozas e mozos que participarán dende Galicia con Senda Nova son:

• Roberto Iglesias: estudante de oceanografía na universidade de Vigo e membro activo de entidades adicadas ao coidado de acuarios para manter e preservar especies autóctonas de Galicia.
• Lorena Cancela: voluntaria en activo da Cruz Vermella Carballo, realizando tarefas de captación de financiación, organización de alimentos e no proxecto “Avoas e avós educadores”. Natural de Carballo.
• Laura Torres: membro activo e da parte organizativa das Asociacións Cultural e Xuvenil Arume de Verdillo, desta última tamén pertence a directiva. Asociacións que intentan manter e preservar a cultura eo folclore galego. Natural de Berdillo-Carballo.
• Ainoa Antelo: membro da directiva da Asociación Cultural Castro-Meda de Zas. Membro da parte organizativa de diversas actividades como a Festa da Carballeira ou o San Xoán en Zas; tamén realizan diversas actividades de mantemento e preservación da cultura e o folclore galego. Natural de Zas.
• Ángela Cambón: voluntaria en diversas entidades entre elas Senda Nova, da cal forma parte da directiva e do núcleo organizativo. Responsable da organización do intercambio e monitora do grupo de participantes que viaxan con Senda Nova. Natural de Carballo.