O número 3 da revista ABRINDO CAMIÑO xa está na rúa. O pasado sábado día 18 démoslle a benvida ao que é a cuarta edición (0,1,2,3) da revista editada pola Asociación Ambiental Senda Nova.

No acto estiveron presentes colaboradores/as da publicación, persoas que tiveron redactado artigos neste último volume. Ademais estiveron presentes representantes de establecementos colaboradores  e tamén familiares de rapaces e rapazas da Escola Ambiental. E é que a rapazada da Escola foi protagonista no acto de presentación da revista visibilizando con intervencións individuais de cada participante, a labor que se está a levar dentro do proxecto.

En canto á publicación, esta segue a evolución constante en número de páxinas que se veu visibilizando en cada número. Deste xeito, este último chega a 56 páxinas a toda cor que manteñen a calidade de encadernación e maquetación.

A revista mantén as seccións clásicas de números anteriores, aumentando o número de artigos na maioría das mesmas. Os colaboradores e colaboradoras das seccións máis atemporais mantéñense case na súa totalidade, con enfoques específicos nun número que pon o foco na destrución dos camiños tradicionais e beira de canles fluviais. Precisamente na sección CONTRA NATURA e EN MOVEMENTO  afóndase nas maiores problemáticas ambientais e fanse diferentes reflexións sobre actuacións proxectadas como circumbalacións, actuacións en beiras de canles fluviais ou polígonos eólicos.

Os polígonos eólicos seguen a ocupar unha parte importante na publicación, dando resposta ás peticións de colectivos, plataformas e movementos veciñais que se poñen en contacto connosco solicitando axuda contra a sen razón destes proxectos que pretenden converter o noso rural en polígonos industriais.

EN MOVEMENTO e ACCIÓN MOCIDADE  son dúas accións tamén importantes dende o inicio xa de ABRINDO CAMIÑO. Non é menos neste número xa que son áreas extensas que pretenden visualizar proxectos de entidades que teñen como obxectivo poñer en valor o noso rural a través da cultura e contacto co medio a través de accións ben diferentes.

Outras seccións son SENDA SOLIDARIA, ou DENDE LONXE, con contidos e reflexións diversas no que pretende aumentar a calidade da publicación para unha visión completamente transversal do rural no que vivimos.

Agradecidos quedamos a todos/as aqueles/as que déchedes a benvida a este novo número, especialmente a colaboradores/ as  que dun modo u outro aportades para que isto sexa posible con esta filosofía.

Seguimos lembrando o grandísimo esforzo posto por esta entidade para acadar esta publicación que consideramos de calidade en canto ao aspecto físico, pero tamén en canto a que é capaz de recoller, cada día máis, o movemento e inquedanzas da sociedade desta parte da Costa da Morte. É quen de visibilizar problemáticas e movementos veciñais e tamén é quen de asentarse no tempo cada día con máis empaque.

Facer isto case só co apoio do pequeno comercio e comercio sostible non é fácil, máis aínda dende o traballo desinteresado para encaixar todos os bolillos.

Podes facerte coa revista nos seguintes puntos:
Libraría Teldi    Carballo
O Logradouro   Carballo
Libraría Clarión    Carballo

Donativo: 3€

Escola presentacion revista 3

Escola presentacion revista 2

Escola presentacion revista