Dentro da nosa aposta polo coñecemento,  recuperación e protección do patrimonio cultural, naceu o Inverno Ancestral. Un proxecto co que pechamos o ciclo de actividades anual  e co pretendemos coñecer e recuperar ese patrimonio inmaterial que urxe recuperar e potenciar se non queremos perder para sempre parte da nosa historia.

O Inverno Ancestral confórmase como un proxecto innovador e pioneiro no senso de unir baixo un mesmo programa, actividades diferentes pero cun nexo común: A recuperación das nosas tradicións. Unha viaxe ao tempo dos nosos avós para coñecer e contribuír á transmisión de elementos dunha cultura milenaria, transmitida de xeración e xeración, para mantelos no presente e no futuro.

Ningunha época do ano podería ser mellor que o inverno para adentrarnos nun pasado cheo de lendas, personaxes míticos, xogos populares, Xoves de Filmes… Na lembranza daqueles tempos en que o lume do lar era a mellor calefacción e as historias dos vellos arredor da lareira a máis proveitosa fonte de coñecemento.

Para recuperar as nosas tradicións o máis proveitoso é ir a onde estas naceron, ir o medio rural, ás nosas aldeas; e alí, fusionados coas súas xentes, auténticas enciclopedias cheas de sabedoría, coller o mellor dese mundo que nós non vivimos directamente pero que forma parte do que fomos e do que somos como pobo, un pasado que con este programa de actividades estará máis vivo que nunca.

Imaxinade unha vida sen ordenadores, sen televisión, sen radio… Imaxinade un mundo sen centros comerciais, nin xoguetes de plástico e con pilas… Un mundo de poucos recursos pero cheo de solidariedade, imaxinación e riqueza cultural.

Imaxinade, soñade e vivide con nós o Inverno Ancestral.

9º Inverno Ancestral Cartel jpg

OBRADOIROS DE PEGADAS E INDICIOS

Deste xeito, os vindeiros 9 e 10  de decembro realizaranse dous Obradoiros de pegadas e Indicios (un cada día). Terán como obxectivo aprender máis sobre a nosa fauna autóctona, sobre todo a relacionada cos mamíferos. Estas xornadas enmárcanse dentro das actividades do programa ESPÍAS NO BOSQUE, financiado pola Deputación da Coruña. As actividades son de bald. Máis info e inscricións en   sendanova@hotmail.com e 611037617.

VISITAS DO APALPADOR NAS ESCOLAS

Como en anos anteriores, dende Senda Nova tamén acompañamos ao Apalpador na súa visita ás escolas unitarias das comarcas próximas. Co Apalpador tamén van unha serie de coñecementos do entorno e dos mamíferos máis representativos do noso rural. Actividades enmarcadas dentro do programa ESPÍAS NO BOSQUE, financiado pola Deputación da Coruña.

CONVERSAS DO RURAL

Com cada ano poñemos en marcha as CONVERSAS DO RURAL, unhas xuntanzas informais que pretenden poñen en valor figuras importantes na dinamización e mellora da nosa bisbarra dende o activísmo social, cultural ou ambiental. Tamén visións diferentes dos rurais e activismos noutras partes do mundo.

As conversas serán todas ás 19 h no Espazo da Natureza de Oza  e mantéñense como actividades participativas do público, tendo como obxectivo primordial o coñecemento de valores e métodos de traballo que levan a estas persoas a establecer o compromiso social.

Estas son as diferentes propostas

OS ESPIAS NO BOSQUE AGARDAN AO DÍA 29 PARA RECIBIR AO APALPADOR

A parroquia de Carreira recibirá ao Apalpador o día 29, cando o carboeiro, na súa viaxe dende o Courel, desenvolva a etapa que o leva dende Coristanco ate Carreira.
Os ESPÍAS NO BOSQUE de Senda Nova serán os encargados de facerlle o recibimento á súa chegada a Carreira dende o monte de Pico de Meda.

OBRADOIROS DENDE AS 17H
Deste xeito, a partires das 17h da tarde, dende o local social, haberá OBRADOIROS DE PEGADAS E INDICIOS, para que os máis pequenos saiban máis sobre a fauna autóctona da contorna, uns coñecementos que serán ampliados coa chegada do Apalpador, grazas á súa sabedoría sobre a natureza.

Os máis maiores terán a oportunidade de participar na visita guiada á aldea e ao Museo do Liño , unha proposta conducida pola Asociación de Veciños o Santiaguiño de Carreira para destacar o patrimonio etnográfico da parroquia.

Nos obradoiros e visitas guiadas poderá participar quen queira ata esgotarse as prazas.

Os actos de recibimento ao Apalpador continuarán co recibimento aos nenos dende o local social e serán amenizados polo grupo de gaitas CHURÍA de Zas.
Ademais da Asociación de Veciños O Santiaguiño de Carreira, colabora o Concello de Zas e a Deputación da Coruña dentro do programa ESPIAS NO BOSQUE.