Fina un 2016 de auténtica consolidación. De aniversario dos dez anos de existencia
Fina un 2016 de auténtica consolidación. De aniversario dos dez anos de existencia
foto grupo activo
Fina un 2016 de auténtica consolidación. De aniversario dos dez anos de existencia. De andaina abrindo corredoira entre silvas, lama e toxos, cando andar polo monte era cousa de ben raros. Dez anos que se pechan cun esforzo consolidado a prol do patrimonio máis cercano, que se traduce nunha programación asentada con máis actividades abertas que semanas ten o ano.
Esta década permitiunos comezar, e tamén interpretar cal pensamos que é o camiño correcto. Crer na utopía e aprender a sacar folgos, ilusión e forzas cando a senda parece impracticable.
Aprendemos un pouco a rir, a gozar, a sufrir, e a buscar recompensa a un traballo constante e terco nas verbas dun neno, quizá dun maior nunha aldea, dunha compñeira ao mellor…
A superar as conductas nocivas, a arredarse sen máis ferramenta que o leve sorriso e o paso ao lado, deixando adiantar a quen leva presa por chegar, non sabemos donde.
Péchase unha década cun recoñecemento da veciñanza de Bergantiños. Un premio Bergantiñán do Ano que recollemos con agarimo e agradecemento. Facémolo extensivo a todas cantas entidades culturais, veciñais, deportivas, administracións…atopamos no camiño, traballaron connosco e ( salvo moi contadas), mantiveron o apoio dende os principios ata agora.
ABRINDO CAMIÑO quixo xuntar en setembro a unha xeira delas na celebración do noso X aniversario. Foron unhas xornadas de mostrar o noso traballo durante estes anos e foron, sobre todo, a xuntanza perfecta para a reflexión e a decisión de que compartir recursos, formas de traballo, organización de actividades…entre entidades que compartimos un mesmo espazo xeográfico, é un dos pilares e unha das esperanzas para un noso rural que agoniza a cando as carballeiras.
O ano 10 de Senda Nova pecha con máis recursos, un teito que compartir e, coidamos, ilusións renovadas. Seguimos a precisar na andaina máis persoas. Máis compromiso e responsabilidade voluntaria na procura das metas.
Estamos seguros que o temos escondido no corazón e a ilusión desta veciñanza. Agardámolo. Agardámoste.
Bó ano a todas e todos.
foto grupo activo
